شادی سے پہلے بہت صحت مند تھی لیکن چہرے پر اکثر پھنسیاں نکلتی رہتیں۔ انہیں صاف کرنے کے لیے میں خون صاف کرنے والی دوا پینے لگی حتی ٰ کہ دن میں کئی دفعہ پی لیتی۔ رات کو آنکھ کھلتی تو شیشی سے منہ لگا لیتی۔ ملتانی مٹی کا ماسک لگاتی تو مٹی کھا لیتی۔ پھر مٹی کھانے کی لت پڑگی۔ کالج میں بھی یہی حال رہا۔ پھر شادی ہوگئی۔ اب دو بچے ہیں لیکن میری سردمہری کی وجہ سے گھر میں جھگڑا رہتا ہے۔ میرے سارے ٹیسٹ ٹھیک آئے لیکن میری سہلیاں، گھر والے اور پڑوسنیں مجھے چلتا پھرتا مردہ کہتی ہیں۔ مجھے لگتا ہےمیرا خون اندر ہی اندر سڑگیا ہے۔میں پہلے کی طرح صحتمند ہونا چاہتی ہوں۔ (س۔جہلم)
مشورہ:بی بی! ہر چیز کی زیادتی نقصان دہ ہے۔ آپ نے چہرہ نکھارنے کے لیے صافی پی، تو اس طرح جیسے نشئی پیتے ہیں۔ پھر آپ ملتانی مٹی کھانے لگیں۔ پیٹ میں مٹی جاکر نقصان پہنچاتی ہے۔ آپ نے اپنی صحت خود تباہ کی ہے۔ اب شوہر کے ساتھ ایسا رویہ رکھتی ہیں جس سے آپ کی ازدواجی زندگی تباہ ہوسکتی ہے۔ آپ اپنا محاسبہ کیجئے اور گھر، بچوں اور خود پر توجہ دیجئے۔ اب آپ سب سے پہلے اپنی خوراک پر توجہ دیجئے اور پھر پور غذا کھائیے تاکہ آپ کی صحت بہتر ہوسکے۔ پانچ کھجوریں ایک گلاس دودھ میں ڈال کر اس کا ملک شیک بنائیے اور پی لیں۔ دن میں تین کیلےکھائیے۔ شوہر کے ساتھ اچھے طریقے سے پیش آئیے ورنہ پچھتائیں گی۔ ایک اچھی لڑکی بیوی بننے کے بعد ماں بنے تو اس کی ذمہ داریاں بڑھ جاتی ہیں۔ میں نے اتنی کمزور خواتین بھی دیکھی ہیں جو پانچ پانچ بچے سنبھالتیں، گھر کا سارا کام کاج کرتیں اور شوہر پر بھی پوری توجہ دیتی ہیں۔ وہ تمام فرائض خوش اسلوبی سے نبھا رہی ہیں۔اپنا ، اپنے بچوں اور شوہر کا خیال رکھیے، سب ٹھیک ہو جائے گا۔